حوار بين الشاعرين نجيب سجيم ونجدي حاطوم شو صايبك تا غبت عنا هيك
حتى لشعرك جاعت الازهار
وزهر الشعر شعرك يا نجدي بيك
طالع ع شبّاك العتم والنار
نجيب سجيم
.......
شو صايبك تتقول اني غبت
وتارك حنين الوقت عالازهار
بتعرف حروف الشعر اني ذبت
ومذوب الكلمات عالزنار
نجدي
.........
يا مذوّب حروفك على الزنار
لو غبت بتظلك مع المحبوب
لا تذوّب الكلمة ع خصر النار
عا بعضنا لازم محبة نذوب
نجيب سجيم
........
ما بذوّب الكلمه ع خصر النار
بيذوب خصر الجمر من كلمه
وبحمل قناديلي فرح بيغار
حتى نشوف الحب بالظلمه
.نجدي
.........
يا ذايب ويا مذوّب المحبوب
عا وهج جمرة وعا خصر حبقة
كل الحكي المش شعر بدو يذوب
والا كلام الشعر ما بيبقى
نجيب
..............
الا كلام الشعر ما بيبقى
وزواده الاحلام بدنا نشوف
وكل ما كتبنا حروفنا بترقى
وبتصفق النجمات النا كفوف
نجدي
.............................
بزوادة الكلمة كتبت حروف
وقلام شعري حامل سيوفي
وكلما بصلاتي فتحت ديي كفوف
بقرا حياتي سطور بكفوفي
نجيب
........................
كل ما فتحت القلب عالصفحات
بيركض حنين العمر عرفوفي
بتغفى ع عطر الورد هالنسمات
وبترقص الاهات ع دفوفي
نجدي
........................
بستان عمري ودمع عيني ميّ
يا مين فات وشاف بستاني
وفي تحت منهن لون روحي فيّ
من هيك صاروا خضر احزاني
نجيب
.....................
لما بخيالك ظلها بيسهر
بيصير حزنك يشبه الرمان
بتنزل شفاف الحب وبتسكر
وبيضحك الرمان عالصوان
نجدي
........................
]شوف المطارح بالدني كلاّ
نشربت من دموع الشتي بتخضر
الا الوجوه ال ودّعت اهلا
نشربت من عيونا شتي بتصّفر
نجيب
...
الا بعيونك يا سهر ما بنام
في غربة الاحلام ما بتظل
روحي الك يا ورده الايام
بيت الدفا وكل الوفا الما قل
نجدي
جبينك سما وقلبك تلج صنين
وشلال روحك للوفا مرايي
شتّي قصايد شعرك الحلوين
بيدفى الحكي وبتزّهر حكايي
نجيب سجيم
موضوع: حوار بين الشاعرين نجيب سجيم ونجدي حاطوم 
الأربعاء أبريل 15, 2009 9:05 am
