كنتي وصرتي


كنتي بْصِباكي وَهْج ومْرايي

وقديش حِبْر الشعر غنّالك

صرتي ع حِبْرك متِل مِحّايي

وما عاد فيكي تكِتْبي حالِك.....

كنتي جمر شعلان ياسمرا

تْدّفي تَلِجْ عمْري بْتِنْهيدي

صِرْتي إذا نِمْتي عَلى الْجَمْرة

تبرد وإنتي تظلّك جْليدي.........

كنتي متل حبْقِة طِهِر بالفَيّ

وْمِلْيان قلبك حُبّ وِدْيانِة

صِرْتي بِكاسِكْ تِسْكَري عَ المَيّ

وْدَمِّك مْعتّق خَمِرْ وِقْناني ...........

كنْتي عَ تخت الورد مَرْجوحة

وْصَوت وْمُوسيقى وشعر بالمحكي

صرتي صدى نايات مبحوحة

وألحان ع سْنين الصّبا تبكي...........

كنتي تجافي الشعر وكْبِرْتي

وْمِنْ هيك عا بكّير خَتْيَرتي

صرتي وكنتي.. سنين فوق سنين

يا ريت لا كنتي ولا صرتي

نجيب سجيم