يا معلمي
يا معلمي عنك شو بدي قول ...مخجول متل الزنبق المخجول
كل ما تنهدت كرمالك ..بتتكسر خطوط العرض والطول
يا ريت بيحسوا باحوالك.......قديش دربك بالشقا مجبول
ويكرموا شي نهار اعمالك....عا ربع ما بيكرموا مسوول
وج القمر طالع من خيالك...بيضل يضوي ع الدني عاطول
لون المدى مفتوح ع مجالك...اكتر من الرهجة بذهب ايلول
صوت العطر من دفق شلالك...وعطرك من وراق الوحي مغزول
والله العلم عالارض ودالك....حتى لبست سيف الوعي المصقول
علمتني اشمخ على جبالك....ابعد من المالوف والمعقول
علمتني اضوي على تلالك...بالنور حتى اكشف المجهول
علمتني اسهر بعرزالك....قطف من كرومك عنب معسول
علمتني لو وقف قبالك....وقف الارض وحرك الاسطول
بعدك رمح والعز بيطالك...متل الزرار بعروة المريول
بعدك صبح والورد غنالك...ع جبال ع حفافي الودا ع سهول
من هيك لا تسال ع رسمالك...رسمالك علوم وادب واصول
اشمخ وشوف علا الدني حالك...بيزول مجد الارض طول وعرض
ومجد المعلم مجد ما بيزول
نجيب سجيم
الأربعاء أبريل 15, 2009 8:24 am