رباعيات من يوم
مِنْ يوم ما راحت عَ تاني ميل
لا عْرِفْتْ وَينا وَلا عِرْفِتْ وَيني
ما ظلّ في حَبِّةْ عَتِم بالليل
وْلا ظلّ في حَبِّةْ غَفـَا بْعيني ...
مِنْ يوم ما نويِتْ عَلى الهِجْران
يِبْسِتْ عْيوني بْدَمِعْها المَخزون
وْلوما بْعُيوني إنتْ يا لبنان
ما ظلّ بالهجران عندي عيون ...
مِنْ يوم ما غِفْيِتْ عَ تاني سْرير
وقلبي عْليها بْيِحِسْدَك يا تْراب
أرز الصبا بْعمري حنى بَكّير
وصاروا غْصونو مْنِْ التّراب قْراب ...
مِنْ يوم ما فلِّت بكوا الأطيار
ما ظلّ عِطْر وْلا وَرِد أحمر
وحتى بْرَبيعُن يِطْلعوا الأزهار
قلبي وقَع عَ الأرض وتْكَسَّر ...
مِنْ يوم ما غِبْتي الشمس بِغْياب
وِالعَتِمْ لا خَلاّ وْلا بَقَّـا
رح ظلّ ناطر دقِّتك عَ الباب
عَ الباب دقّة وْعَ القلِب دَقـَّة ...
مِنْ يوم ما شِفْتِك عَ درب العين
شجْرة حزينة لا ثَمر لا وْراق
عا جِذْعِك حْفَرْت العِشِق حرْفَين
صاروا غْصونِك بالهوا عشَّاق ...
مِنْ يوم غيْبِتْها الشِّعر بِغْياب
لا عاطْفِة وْلا شاعر تْجلاّ
ليل الحُروف اْبْيَضّ شَعْرُو وْشابْ
وْرِزْقَك ياحِبْر الليل عا ألله ...
مِنْ يوم ما لْبِسْتي الْحَلا مِيْني
قِصْرُوا الثّياب وْقِصْرِت سْنيني
يا خَوف قلبي تِرْجع المُوضَة
تْفَصّل عَ جِسْمِكْ وَرْقِةِ التّينِة ...
مِنْ يوم ما فستانْها الصيفي ارْتمى
عَ اللّيل ضّوَّا الْفَجْر عا فَيّ النّخيـل
عَ الوهْج بلّش يِعْرق جْبين السّما
وْيِنْشُر قميص الغَيم عَ حْبال الغسيل ...
مِنْ يوم ما خْلِقْتي الشّمِس شَمْسَين
وِبْهالسّما نُورَين صار النُّور
وِالأرْض مِحْتارَة عْلى المَيلَين
مِنْ حول أيّا شمس بدْها تْدُور ...
مِنْ يوم ما كْتَبْتي وْكَلامِكْ صار
بالعامّية وْهَيْبْتـِكْ هَيْبـي
جِهْلان صايِر هالْوَرَق خِتْيـار
بِيْشيْبْ شَعْرُو بْيِصْبُغ الشَّيْبـي ...
مِنْ يوم ما فَلَّيْت يا تْرابي
وْجاعِت غْصون الأرز عَ غْيابي
رِحْت وْجِبِتْ جِمْعَة بْسَبِعْ تِيَّام
وْفَوق الحُدود فْتَحِتْ بُوَّابـي ...
مِنْ يوم ما بْكيتي دَمِعْ شَعْلان
والفَجر نايـِم مِسْتِحِي يُوعَى
وْحتّى النّبِع عاف الْبِكِي وْزَعْلان
طَقْطَقْ عَطَشْ وِالْمَيّ مَقْطُوعَة ...
مِنْ يوم شِعْر وْعاطْفِة وِكْتاب
بْدمِّي كْتَبْتـُو وْما عْرِفْت النَّوم
اْنْشَالله سَوا كِلْ يَوم يا أحبـاب
مع بعضْكُم تِقْرُوا سَوا .... مِنْ يَوْمْ.
نجيب سجيم
الأربعاء أبريل 15, 2009 9:17 am